Eph 1 | GbrGAW | STEP | Eyi anugundo a Yesu viyi n fye fi n Afisusu, fyei vi Dagayi ɓo cici nyi, miɓi fye gna lo. Bulus nu ka ga fye, n Shekwoyi wa kniwo wa ze Yesu Kristi tnu-tnuyi nyi.

Ephesians 1

1 Eyi anugundo a Yesu viyi n fye fi n Afisusu, fyei vi Dagayi ɓo cici nyi, miɓi fye gna lo. Bulus nu ka ga fye, n Shekwoyi wa kniwo wa ze Yesu Kristi tnu-tnuyi nyi. 2 Fa owo anabarka n bugba fuyi ɓa ze fye nya, n Shekwoyi eyi Dada tnu n cei n Yesu Kristi eyi Dagayi nyi. 3 Yi ci Shekwoyi lo, eyi Dagayi Yesu Kristi Dada n wa tuyi anabarka n anabarka doho-dohoi n shemi, ntuge yi zhin Kristi a nya nu.

Shekwoyi Shiri Dnagmayi

4 Tunyi n sapa, to ai zhin anyi n, Shekwoyi wa kni yi n na bai ya ze wo nya, ntuge wa zeyi aza agyi-gyiyi n wo awyeba, ntna laifi, eyi n yi gni-agni zhi n wo abye n wo ye-yei pwi. 5 Owo shiri, tna do shanyi nu nyi wa ze yi owo aɓi, cenu a zhin wa tnu Yesu Kristi yi wafi ntu yi ɓo. Wa zhin ce ntuge wo ɓei n cei pma nu.

6 Mwa-mwa n Shekwoyi aba ntu n wo alheri ɓo n wo ye-yei nwa zeya puyi, ntuge yi zhin owo Nugun ye-ye yi aɓi nu. 7 Owo alheri mwa lo n yi aba har wa eyi alaifi kuya n wo Nugun ami yi, oza n wa gni yi nyi. 8 Woi la owo alheri mwa-mwayi ze kpeyi. Gama wo kpeyi ye lo sarai n nya yi n kwo gna bmiya ntu yi ɓo n sayi vinya.

9 Shekwoyi ku owo asiri wu yi nkwo ɓei so shi, dalili n wa tnu n Kristi yi, enya n wa zhin shiri dna n sun-sun gye tunyi n sapa. 10 Owo nufi nu nyi, nge sanu nsa lasi wo ɓa yei zhi n gnisun, aba n yi nyi vinya n eshe kwo n anyi, ya gnisun n woi dna Kristi nyalo-nyalo. 11 Ntu nya ɓo n Kristi n ku zhin, yi ku ze a cauta n Shekwoyi aba n ɓa da wo agma, gama dna n Shekwoyi shiri wo ɓei kni yi tunyi n sapa, aɓo vinya ɓei zhin shiwo ɓo zhin shiri nu. 12 Shekwoyi ɓeye vinya kwonu ge ya la Shekwoyi tu, ya gawo mwa-mwa ntu n na aɓo a yakwo ye nwa zhin yi nyi, n yi zhin aza kmisunyi n ɓa ga Kristi gaiciya nyi.

13 Ntu nya ɓo n Kristi wa zhin nyi, ofye vinya ce n fya wo nabari manayi shi oza ɓa pwo, fya ga Kristi gaiciya nyi, a tufye eze n Zafun Gyi-gyi-yi ge fye zhin Kristi nya nu, oza n na ɓei zhin wo alkawali ga a Yesu viyi nyi. 14 Owo ase-se n yi mi zhin Shekwoyi tuze nu ge, wo ɓa gayi anya vinya n wa zhin yi alkawali, Zafun ase-se n yi mi wuyi ge Shekwoyi la yi lu si, wa ɓe yi n wohin tukwo aba, dalili nyi n jesun n kwo ɓa zhin ya ci yi Shekwoyi.

15 Cenu zhin, tunyi esa n mi ɓei wo fye gaiciya ga ɓo dna n Dagayi Yesu, n ye-yei nfye wu a Yesu viyi n nna aba vinya nyi. 16 – 17 Mito fa Shekwoyi godiya zhinɓo ntu fye ɓon. Mi zhin fye aduwa n esai vinya mi-i nya Shekwoyi, Dagayi Yesu Kristi Dada, wa ga fye ɓeyekpe, fya gye dei-dei, fya bwa awyega kwo nyikado nu zhin Kristi a, n na aɓei vinya n wo ku zhin fye nyi. 18 Mi zhin aduwa, n na bai of ye abugba ɓa bwa buzangna, n na bai nfye ɓa gye nya wye n na bye, n wo yi fye fya gni nya bwa n wo yi nyi. Miye fya kpe ge Shekwoyi la ze nyabwai, ntu ge eyi n yi zhin Kristi a nya nyi aku yi gawo. 19 Mi zhin aduwa ge fye ɓa ya awyega bwa, shi owo iko nyi ge kwa bma aza zhin nu nɓa gawo gaiciya. 20 Iko dnagmayi ye nu bwa jesun n kwo ɓei la Kristi kala n efi, kwa se wo ase tu n Shekwoyi bwai-zhe-bwa n eshe. 21 Ndu esu doho-dohoi, kwo abegyiyi doho-dohoi. E, owo mwamwa du zaho-zahoi nya lo, n na anyi ye kwo anyi do n ɓaye ɓeɓelo nyi. 22 Shekwoyi ku anya fi n wo apita sinta woi lawo ze Tukwoda ikklisiya nya vinya. 23 Nkwo zhin wo nayi nyi n nu-nuyi n wohin tukwoyi Tukwoda n Nyagayi doho-dohoi nya, abaho-bahoi.